Mela Seîd ji pêşîvanên Cemaata Hîzbûllah bû û bi fedakarîya xwe dihat nasîn. Mela Seîd 7 salên dawî yên emrê xwe di oxira Îslamê de li muhaceratê derbas kir. Mela Muhammed Beşîr Varolê ku kekê wî ye di salvegera duyemîn a wefata wî de qala birayê xwe kir.

Mela Muhammed Beşîr Varol di destpêka axavtina xwe de diyar kir, birayê wî digel ku qezaya trafîkê derbas kiribe û rehmet kiribe jî ji şehîdan tê hesibandin û dû re wiha li axavtina xwe zêde kir: “ Em ji ber 3 sedeman ji birayê xwe Mela Seîd re dibêjin şehîd. A ewil weke ku Pêxemberê me dibêje ‘Kî li hîcretê wefat bike şehîd e.’ A dudowan dîsa weke ku Pêxemberê me dibêje ‘Kî bi ilmê meşxul bibe ew şehîd e.’ A sêyemîn jî;  kî di afetên mîna erdhejê de wefat bike şehîd e. Em dikarin qezaya trafîkê jî têxin nava van.Ji ber vê yekê em ji Mela Seîdî re dibêjin şehîd.”

 “Kesên ku weke birayê min wefat bikin şehîdên axretê ne”

Mela Muhammed di berdewama axavtina xwe de diyar kir kesên ku bi vî awayî wefat bikin ne şehîdên cîhanê ne û dû re wiha li axavtina xwe zêde kir: “Ew şehîdên axretê ne. Îro jî salvegera wefar û şehadeta birayê min e. Jiyana wî ew qas tije û baş bû meriv nizane ji kû derê dest pê bike.Digel ku zaroktîya min pê re zêde derbas nebûbe jî ez dikarim gelek zêde qala wî bikim. Ji ber ku ez li gelek cihên cûda bi ilmê re meşxûl bûm zaroktîya min pê re derbas nebû. Di pêvajoya tahsîlkirina ilmê de bavê me destûr nedida ku em zêde werin mala xwe. Lewra dixwast ku em her tim ilmê tahsîl bikin. Ji ber vê yekê em zêde li malê neman û zaroktîya me bi hev re derbas nebû. Lê dû re ji bo hînkirina ilmê min birayê xwe anî ba xwe û em pêkve di medreseyekê de man û me di pêvajoyê de pêkve kitêbên medresê temam kir.”

 “Gelek zêde bi edeb û heya bû û exlaqê wî xweş bû”

Varol di berdewama axavtina xwe de diyar kir Mela Seîd di wextê telebetîya xwe de jî ji teref derdora xwe ve gelek zêde dihat hezkirin û dû re wiha li axavtina xwe zêde kir: “Birayê min gelek zêde bi edeb û heya bû û exlaqê wî xweş bû. Di dersên xwe yên medresê de gelek zêde jêhatî bû. Ji ber vê yekê hemû kes jê hez dikir. Hetta ji ber fitratê min ji vî birayê xwe ji yên din zêdetir hez dikir. Xweda vê yekê xistibû qelbê min. Bi vî awayî ez û wî pêkve heta demekê li Şêx Xelîl man.”

“Ji gelek aliman dersê wergirt”

Varol di berdewama axavtina xwe de diyar kir, birayê wî Mela Seîd ji gelek zêde aliman dersê wergirtiye û piştî ku perwerdehîya xwe ya medresê temam kiriye îcazeta xwe stand. Varol dû re wiha got: “Yek ji van aliman Seyda Mela Mihemed Şerîf e û ez ne şaş bim birayê min îcazeta xwe jê girt. Dîsa di pêvajoya perwerdehîyê de ew demekê li Tilloyê ma û li wê derê ji Seyda Mela Burhan ders girt.Elbet ji ber ku birayê min bi edeb û haya bû seydayên wî jê hez dikirin. Her tim derheqê wî de xeber didan. Hetta em di roja xwe ya îro de jî ji vê yekê re şahid in. Birayê min piştî vê qonaxa Tilloyê derbasî Farqînê bû.”

“Ji ber ku bi aqil bû di ticaretê de jî jêhatî bû”

Varol di berdewama daxuyanîya xwe de diyar kir birayê wî di ticaretê de jî jêhatî bû û dû re wiha li axavtina xwe zêde kir: “Min li Farqînê cihekî kitêbfiroş vekiribû. Ji ber ku karê min zêde bû û min wext nedidît kara me nedibû.Lê belê çawa ku Mele Seîd hat wê derê êdî me nema zirar kir û kara me baş bû.”

“Birayê min li dikanê bi xortan re eleqedar dibû û bi wan re ders dikir”

Varol di berdewama axavtina xwe de diyar kir birayê wî li dikana kitêban him karê xwe dikir û him jî bi xortan re eleqedar dibû û ji Îslamê re xizmetê dikir. Varol dû re wiha li axavtina xwe zêde kir: “Birayê min li dikanê bi xortan re eleqedar dibû û bi wan re ders dikir. Di salên 80î de kitêbfiroş bi qedr û qiymet bûn, wek weqf û komeleyekê kar û fealeyet dikirin. Bi kurtasî wê demê wek navenda tahsîlkirina ilmê bûn. Ji ber vê yekê Mela Seîd gelek zêde bi xortan re li wê derê eleqedar bû.”

“Kêfa wî qet ji xwenîşandanîyê re nedihat û xwe dernedixist pêş”

Varol di berdewama daxuyanîya xwe de diyar kir birayê wî exlaq û edeba xwe ji cemaata ku di nav de bû stand û dû re wiha li axavtina xwe zêde kir: “Exlaqekî wî pir xweş hebû: Kêfa wî qet ji xwenîşandanîyê re nedihat û xwe dernedixist pêş. Biya min vê yekê ji Şehîd Rêber girtibû. Lewra gelek zêde bi Şehîd Rêber re ma û jê ders stand. Ji bilî vê yekê ji xwe xwenîşannedayîn û pesnaxwenedayîn di fitrata wî de hebû. Hevalên wî yên ku pê re mane ji xwe wî nas dikin.”

“Gelek xizmetên mezin kir û haya gelek kesî jê tunebû”

Varol di  berdewama axavtina xwe de diyar kir birayê wî xizmetên xwe bi îxlas û di nav bêdengîyê dikir ku kesên wî nas nakin haya wan ji xizmetên wî tune bû. Varol dû re wiha li axavtina xwe zêde kir: “Mesele; hinek însan hene dema ku tiştekî biçûk dikin hema di cî de reklama wî tiştî dikin û wî tiştî dixwazin gelek mezin nîşan bidin. Ew kes ji vê yekê hez dikin. Lê belê birayê min ê şehîd qet bê yekê nedikir. Gelek xizmetên mezin kir û haya gelek kesî jê tunebû. Ji ber vê yekê di xizmetên wî de bereket hebû. Bi vî awayî me digel birayê xwe xizmet kir. Di salên 90î de tiştên ku me dixwast hat serê me. Digel ku me nedixwast di navbera me û PKKê de hinek bûyer pêk hatin. Ji ber vê yekê ez çûm Êlihê û birayê min jî li Farqînê ma. Bi awayî demeke dirêj me hev nedît.”

“Wextê xwe yê di girtîgehê de bi temametî ji tahsîlkirina ilmê re veqetand”

Varol di berdewama axavtina xwe de qala pêvajoya girtîgehê ya birayê xwe kir û got: “Piştî çendîn salan em digel hev di girtîgehê de man.Ez di sala 2003yan de ketim hepsê û ew jî di sala 2000î de ketibûyê.Em nêzî 7-8 salan pêkve di Medreseya Ûsifî de man. Wê salê qanûnek derket û birayê min hat berdan. Elbet birayê min wextê xwe yê di girtîgehê de bi temametî ji tahsîlkirina ilmê re veqetand.Lewra girtîgeh ji vê yekê re musaîd bû. Di nava rojê de nêzî 20 mahkûm dikaribûn werin ba hev. Birayê min di vê çarçovê de ders dida hevalên xwe. Wextê xwe bi vî awayî derbas dikir. Heta ji ber ku her tim bi ilmê re meşxûl bû carekî nexweş ket.”

 “Ji heval û dostên xwe re xizmet dikir”

Varol di berdewama daxuyanîya xwe de diyar kir birayê wî di şert û mercên giran ên zivistanê bi xwe de jî bi ilmê re meşxûl dibû û dû re wiha li axavtina xwe zêde kir: “Dema ku dersê dida kesên di koxişên binî de mecbûr dima ku şibakeyan veke û ji ber vê yekê hewa cemidî diket hindûr.Birayê min ji bo xwe ji sermayê muhafeze bike naylon li xwe dipêçe. Ew di sir û seqem û berfê de jî bernameyên xwe yên dersê îhmal nedikir. Ji ber vê yekê nexweş ket û hat rakirin nexweşxanê.Di vê pêvajoyê de amelîyat bû. Birayê min ekserîyeta heyata xwe da ilm û ibadetê.”

Varol di dawîya axavtina xwe de wisa got: “Ji bilî ilmê gelek zêde xizmetên wî yên Îslamî hebûn. Nefisbiçûk bû. Li derveyî girtîgehê derd û kulê hevalên xwe guhdar dikir û ji wan re dikbû alîkar. DI girtîgehê de xwarina hevalên xwe çêdikir û firaxan dişûşt. Bi kurtasî  tu carî quretî nekir. Ji ber vê yekê hemû kes jê hez dikir.”(ÎLKHA)