Par wekê îro Serokê Yenî Îhya-Derê Aytaç Baran li navçeya Yenîşehîra Diyarbekirê ji teref PKKyiyan ve hatibû qetilkirin. Bi minasebeta salvegera şehadeta Baranî hevaldozên wî Muzafer Beber û Îbrahîm Yaz qala wî kirin. Wan destnîşan kir ku Baran bi jiyana xwe ya Îslamî ji herkesî re dibû nimûne.

Muzaffer Beber bal kişand ku Aytaç Baran wekê şehîdan dijiya. Beber ragihand ku Baran tevahiya jiyana xwe di rêya Îslam û Qur’anê de xerc kiriye.

Beber destnîşan kir ku Merhum Baran hertim li dijî zalim, tiryak û fihuşê tekoşîn dikir. Beber bal kişand ku ev tekoşîn ji teref hêzên tarî ve nehatiye hezmkirin. Beber dûvre wiha qala Şehîdê kir: “Hêzên tarî her tim dijî rûşenayî û ronahiyê ne. Ji ber vî yekê Aytaçê şehîd kirin. Lê şehadeta wî bû wesîle ku tarîtî ji holê rabû û ronahî hat. Bi wesîla wî gelek kes ji belaya tiryakê xilas bûn. Kesên ku ji malbat û xizmên xwe re dijmintî dikirin dûvre gelek qenc bûn. Gelek dihat hezkirin. Kesên li hawîrdor bi şehadeta wî re wî çêtir nas kirin, exlaqê wî çêtir hînbûn. Kesên ku sedema şehadeta wî hînbûn berê xwe ji neqenciyê fetilandin. Xweda bi şiklekî baş mikafata wî dayê.”

 “Dema ku min xebera şehadeta wî hilgirt min got qey ava kelijandî rijandine ser serê min”

Beberê ku çendîn sal bi Aytaç re di girtîgehê de maye wiha axavtina xwe domand: “Ew birayê minbû. Dostê min bû. Ev nayê qalkirin. Divê ku mirov vî yekê bijî. Dema ku ez qala wî dikim miyê canê min dibe wekê şûjin. Dema ku min xebera şehadeta wî hilgirt min got qey ava kelijandî rijandine ser serê min. Me zû ve xeberên şehadetên hevalên xwe nebihîstibû. Lê dema ku me ji nîşka ve xebera şehadeta kesê ku me wî ji nêzik ve nas dikir û em her tim bi hev re bûn bihîst em gelek qeherîn û xemgîn bûn. Piştî vî şoqê hemî birayên me ji nû ve hatin hemdê xwe û mîrasa ku Aytaç ji me re hêştibû domandin. Ev jî bereketa birayên me yên şehîdan e.”

Beber diyar kir beruya şehadeta Aytaçî wî pê hesiyaye ku dê bibe şehîd. Ji ber vî yekê wî diyar kir heke ku ew bibe şehîd dê şefaetê li wî bixwe bike. Berber destnîşan kir kir ku Aytaç bi soz û helwestên xwe ekolek pir mezin bû. Dûvre Beber wiha pê de çû: “Ew tenê bi serê xwe mêrxas bû, ronahî bû. Ji ber vî yekê wek şîret ez ji hemî xizmên Aytaçî re dibêjim ew mîrasa ku Şehîd Aytaç ji we re hêştiye di çarçova rizayê Xweda de bidomînin. Em niha dibînin ku xwendekarên Şehîd Aytaçî vî barê bi şiklekî baş mil kirine.”

Ji hevalê Şehîd Aytaçî  Îbrahîm Yaz belav kir ku ew hemberî birayên xwe de xwedî tevazu bû. Her wiha Yaz ragihand ku Aytaç bi hişmendiya dawet, fidakarî û wêrektiya xwe dihat zanîn.

 “Ji zarokan re jî digot ‘keko’”

Yaz belav kir ku Şehîd Aytaç bi rûkeniya xwe gelek dilan feth dikir. Dûvre Yaz wiha li axavtina xwe zêde kir: “Me hedîsa ‘Dîn exlaqê xweş e’ di jiyana şehîdî de eşkere didît. Ew bi zarokan re zarok, ciwanan re ciwan û extiyaran re jî extiyar bû. Ew bi wan re bi şiklekî taybet tevger dikir.  Ji zarokan re jî digot ‘keko. Bi wan re di kolan û kûçeyan de top dilîst. Her tim digot; ‘heke em bi van zarokan re eleqeder nebin û bi wab re ranebin  rûneynin û bişiklekî mîhrîbanî û bi rehm li wan tevger nekin, exlaqê Qur’an û Îslamê hînê wan nekin dê ew têkevin axûş û hembêza dijminan.”

Beriya şehadeta xwe li ser gora şehîdek wek kelegirî duaya şehadetê kir

Yaz bal kişand ku şehîd beriya şehadeta xwe li ser gora şehîdek wek kelegirî duaya şehadetê kiriye û Baran li ser goristanê giriye. Dûvre Yaz destnîşan kir ku Şehîd wiha axiviye: “Dua bikin ku ez jî bibim şehîd.”

Yaz axavtina xwe wiha domand: “Lewra ev fitne propexendeya ku dijminên Îslamê dikirin wî pir diqeheran. Ji ber ku pir paqij bû wî van propexendeyên derew û çewt xweşê wî nediçû. Ji ber vî yekê qrmanca wî ya herî mezin şehadet bû. Ji dinê hêvîdar nebû. Me vî yekê di jiyana wî de didît. Dema ku me jê re digot; ‘ dê em beriya te biçin.’ Wî jî digot; ‘ Înşaellah dê ez beriya we biçim. Dê hûn jî werin li ser qebra min bi min re hesbîhal bikin.’ Rastî jî wisa bû.”

Yaz wiha dawî li axavtina xwe anî: “Ya Rebbî! Şehadeta wî mibarek bibe. Me ji şefaeta wî mehrum nehêle.” (ÎLKHA)