​Fesîh Guler Xoce li ber serê qebra xwe hat bîranîn

Ji teref Temsîlkarîya Çinarê ya Weqfa Evîndarên Pêxember ve ji ber 3yem salvegera wefata Fesîh Guler Xoce bernameya bîranînê hat lidarxistin.

Bernameya bîranînê bi tîlaweta Quranê dest pê kir û piştî wê Serokê Bajara Diyarbekirê yê HUDA PARê Wedat Turgut derheqê heyat û şexsîyet û her wisa fedakarîya ku Fesîh Guler ji bo Îslamê kiriye de axavtinek kir.

Turgut di axavtina xwe de destnîşan kir, ew tov û bizrên ku Fesîh Guler Xoce û hevalên wî reşandibûn li temamê cîhanê şîn bûye û a niha li wan deran xizmet tê dayîn. Turgut dûre wiha li axavtina xwe zêde kir: “Bi wesîleya Fesîh Guler  Xoce û hevalên wî bi hezaran însan Îslamê nas kir û bi sedhezaran însan bûn talibê rizaya Xwedê. Birayê me Fesîh Guler ‘fena-fîl îxwan fena-fîllah we fena-fîl cemaat’ hereket kir û ew xwedî şiûra ‘ger lazim be ez dikarim axreta xwe ji bo doz û birayên xwe feda bikim’ bû.  Fesîh Guler Xoce bi vê şiûr û nêrîna xwe ji bi hezaran însanan re bû mînak û rêber. Bi vê wesîlê doz û partîyeke ku mezin dibe û li derdorê belav dibe heye. Di dewreke wisa ya ku tê de însan tên xapandin, însan ji qible, îslam û Quranê tên dûrxistin de ev kom û însanên ku ji teref Fesîh Guler Xoce û hevalên wî ve hat derxistin ji bo temamê bûye hêvî. Ji ber vê yekê hêzên emperyal li ser axên me hesab û planan dikin û hewl didin însanê me ji Îslam û Quranê dûr bikin.”

Turgut di berdewama axavtina xwe de bang li wan xortên ku Fesîh Xoce ew perwerde kirine kir û got “Mesûlîyeta me mezin, barê me giran, wextê me teng û karên me zêde ne. A niha coxrafyaya Îslamê li benda we ye. Divê me di serî de xwe û nasên xwe bi terbîyeya Îslamê terbîye û perwerde bikin da ku em reçetaya xelasîyê karibin şanî xelqê xwe bidin.”(ÎLKHA)